Gal 1 | APZ | STEP | Nje a'amu hwaho Ngkolesiya Jisas Kɨlaisɨmo sɨmeho uyontɨfi uhu'mokuwo'nɨngkohofo sokumo, ngko Poulɨ'ni olo iyoswo semtɨ'mokiyalokweno. A'amu Jisas Kɨlaisɨmo sɨmeho hi'ntnnono uyɨwo'nɨngkohofoso ngko'nji humalohwoneso sekumne'no nakwoe a'amufo loselalokwofo. Nje hungkuno sekwo upa'nɨmno. Ngko olo apousel syoho yalokwe loso a'amu hofɨko ntapmmentohofo'maho. O'o, Jisas Kɨlais poyo pe'nɨmentiso sohumo Mpohwo Anɨtu apa'no ulɨka'mentiso oso hwo'nji nanɨngkwohwo Anɨtu'nji siko olo syoho hiloso ntaponji nɨhwasopomentisiyo hwo'nyoho.

Galatians 1

1 Nje a'amu hwaho Ngkolesiya Jisas Kɨlaisɨmo sɨmeho uyontɨfi uhu'mokuwo'nɨngkohofo sokumo, ngko Poulɨ'ni olo iyoswo semtɨ'mokiyalokweno. A'amu Jisas Kɨlaisɨmo sɨmeho hi'ntnnono uyɨwo'nɨngkohofoso ngko'nji humalohwoneso sekumne'no nakwoe a'amufo loselalokwofo. Nje hungkuno sekwo upa'nɨmno. Ngko oloapousel syoho yalokwe loso a'amu hofɨko ntapmmentohofo'maho. O'o, Jisas Kɨlais poyo pe'nɨmentiso sohumo Mpohwo Anɨtu apa'no ulɨka'mentiso oso hwo'nji nanɨngkwohwo Anɨtu'nji siko olo syoho hiloso ntaponji nɨhwasopomentisiyo hwo'nyoho.

3 Nanɨngkwohwo Anɨtu sohwa'nji nakwoe Hwe Engo Jisas Kɨlaisɨ'nji siko'monta'i siko sekumo yo'mayo wopɨngo selohofohosɨsi sɨmeho pompenjiyo wosejopanjiyoho. 4 Nakwoe wonyomne'no Jisas Kɨlais poyo pe'nɨmentisofoho. Oso'no Setenɨye honɨngkano so'nji yo'mayo hwahoponjo so'nji nakwo a'amu hwahoponjo hopi'nonohino hn'nɨmo yokumpohn'nyo nemokosyohumentanɨngki nakwoe Mpohwo Anɨtu nje hwomu hwahopo uhwatɨmo syofɨsyahonɨngki Jisas kako eno ulonto kanɨngkwohwoe hunomo inɨngkawento Jisas asomo netɨmayo'ne pe'nɨmentisofoho. 5 Oso'no nakwo Anɨtuye yofeso woho'nomano. Engolopohamo woho'nomewo'nɨngkuhwano.

Anɨtuye honɨngkano anga'nohino weho.

6 Anɨtu sekumo sɨmeho sejaponto Jisas Kɨlais sekwoe wonyo so'ne poyo pe'nɨmentiso so'no kako'nji songo ne'no humayo'ne joho selalofoho. I osohumo hohujo ikinjaofontɨfi nusɨkwojaofontɨfi hungkuno kengo somo inɨngkowalokwofo. Oso hungkuno kengo somo sekwo inɨngkawo'nɨngkohofo so'no nje hi ntɨkofahonɨngki ngko yomo yalokweno. 7 Oso hungkuno kengo somo Anɨtuye angopono mipesemotasonehoho. O'o, nɨhu'no awonoho. Anɨtuye honɨngkanoso nɨhu'no kenga'nohinofoho. Kɨlaisɨye hungkuno wopɨngo somo a'amu fiso hofɨko iwolo'mokontɨfi hwasyo hungkuno losetɨhwalokwofo. 8 I nakwo nose'mehwasɨ'manji a'amu ahwomomjoso se'mapijo'manji hungkuno nom'ne kengo sɨmo'mo selɨmentɨhwone hopo'maho. O'o, nom'ne kengo selɨhwasɨ'manji nakumo tɨkanomo menehwajonefoho. 9 Hohonta hungkuno ole nto selɨmentoheso i olohonta apa'no selalokweno. Anɨtuye honɨngkanomne'no hungkuno sɨmo'mo selɨmentohe so'no sekwo huno seyohoho. I a'amu fiso Anɨtuye honɨngkanomne'no hungkuno kengo seloso'manji kako tɨkanomo wamtonoho.

10 Ose selohe so'no fɨsyafɨhupmno. A'amu sohwa nje yofe ho'nomayo'ne hungkuno laselɨmentohono. O'o, Anɨtu kako nje yofe ho'nomayo'ne selɨmentohono. A'amu nje yofe ho'nomayo'ne afofo hungkuno selontɨ'mtentesi ngko Kɨlaisɨye syoho ulohofiyoso miyo'mnesohilo.

Poul Anɨtuye syoho tɨpema'mentiso so'ne hungkunofoho.

11 Nje a'amu soku, hungkuno nehopi waselɨmo. Anɨtuye hungkuno wopɨngo selɨwo'nɨngkoheso a'amu hwahoponjofe huno mta'ango'maho. 12 Olo hungkuno loso a'amu lontɨhwamentiso'maho. O'o, nɨhu'no awonoho. Jisas Kɨlais kako'nohini ntɨhwamentisofoho.

13 Hohonta ngko Jutafe honɨngkanomo ito'nohino inɨngkamote hwo'nyoho. Yo'mayo imote so'no sekwo nto upa'nɨmentohofofoho. Anɨtuye a'amu Jisas Kɨlaisɨmo sɨmeho uyo somo ngko nje yokumpohn'nyo'nji wonyo ulohofonji olo huno loso'nohini syafɨsyonji ngko wae weeo'mo lɨmotefoho. 14 Neyakwosafe yahino somo aho yokumpohn'nyo kemokosyohumamoteso a'amu ngko'nji hungkuno afa'nono lonetɨhwamentohofo osomo uyakolo'mentohefoho. Hofɨko Mousesɨye honɨngkano hungkunomo we'enehwo inɨngkamotofofoho. I ngko engo inɨngkamotefoho.

15 Hohonta osomo inɨngkamote sohwo'ni i olohonta Anɨtuye honɨngkano songo ntopahonjo somo inɨngkowalokweno. Nje na'u ngkimo aswo monɨmaso sohonta Anɨtu ngkine'no hitoho ulofahonɨngki wopɨngo ntohofonto kakoe syoho ulohofiyo'ne nɨhwosopo'mentisofoho. 16 Anɨtu kakoe hwomu ntɨhwamentiso sohune'no ngko hungkuno wopɨngo wolutɨhwamo. A'amu Juta'mnohinɨ'maho, o'o a'amu temtitofo kengo kengo somo kako wolutɨhwano lonto Jisas Kɨlaisɨmo ntɨhwamentisofoho. Oso hohosohonta ngko a'amu nom'ne sohumo Hwe Engo sohwoe hungkuno'no ulohonɨmentohe'maho. 17 Uapousel nom'ne hofɨkoapousel sɨmo'mo imo'nɨmentohofo sohwa Jelusalem humalofo sohwamo mu'maso'njo yonji yo'mayo so'no ulohonɨmentohe'maho. O'o, ngko hwaho Alepiya, a'amu ane sopono womentohefoho. Tɨfi no'mo ngko ango Ntomasɨkos sopono asomo umentohefoho.

18 Oso'no Jisasɨmo uhwonɨmentohe sohonta soswo hufa'u sɨhune nɨyokolofahonɨngki osohonta ngko ango Jelusalem nowenji osopo Pita'nji Sante hufa'u (sɨkuno aho hufa'u hopi'nono nom'ne sɨfe fehohnjo hopi'nono mta'ni) humamentohefoho. Osohonta Pita'nji nekwo Hwe Engo sohwoe hungkuno'no hnnɨmentihwayofoho. 19 Apousel nom'ne sohwamo ngko muhwonɨmmentohefoho. O'o, Jisasɨye konɨngkwa'wehwo Jemɨsɨ'nji Pita ntnnohini uhwonɨmentohe hwo'nyoho. 20 Olo hungkuno loso semtɨ'mokiyalokwe loso nehopi'nohini. Anɨtu kako huno uyohoho. Ngko hwasyo hungkuno maselalokuyohono.

21 Ngko Jelusalem ulɨko'manji hwaho Siliya'nji Silisiya, osohonno umentohefoho. 22 Oso hohosohonta a'amu Jutiyanta'angoso Kɨlaisɨye hungkuno upa'nontɨfi uhu'mokumotofoso hofɨko nje yofe'nohini upa'nontɨfeso nje sɨmano somo manohonyofoho. 23 A'amu ngkine'no upa'nɨmentohofi, Oso hwe hohonta nakwo Jisasɨmo inɨngkowentanɨngkuhwone so'nyumo kako fonjahumojo sohwo olohonta Jisas Kɨlaisɨmo sɨmeho hi'ntnnono uyonto nom'ne a'amu somo Jisasɨye hungkuno lutɨhwalofoho. 24 Ose upa'nontɨfi ngkine'no Mpohwoe yofe ho'noma'mentohofofoho.